269 Awrora
Фотосурет: Gov
Түркістан облысының тарихында алғаш рет ұлдарға арналған 400 орындық және қыздарға арналған 300 орындық ең ірі білім-инновация лицейі ашылды.
Білім ошағының ашылу салтанатына Оқу-ағарту министрі қатысты, деп хабарлайды DKNews.kz.
Ғани Бейсембаев өзінің құттықтау сөзінде мемлекет білім беру сапасын арттыруға ерекше көңіл бөлетінін атап өтті. Осыған байланысты Оқу-ағарту министрлігі халықаралық тәжірибені ескере отырып, 2023 жылдың басында жүйені одан әрі дамыту үшін бес негізгі бағытты айқындады.
Бұл жаңа буын менеджерлерін қалыптастыру, инфрақұрылымды кешенді жақсарту, оқу бағдарламаларын жаңарту, педкадрларды даярлауды жетілдіру, сапаны бағалаудың ұлттық жүйесін трансформациялау.
«Бүгін біз мемлекет жүргізіп жатқан ауқымды жұмыстардың куәсі болып отырмыз. Президенттің қолдауының арқасында 2019 жылы педагог мәртебесі көтерілді. Апатты, үш ауысымды мектептерді, сондай-ақ оқушы орындарының тапшылығын жою үшін елімізде арнайы бағдарламалар мен «Жайлы мектеп» ұлттық жобасы іске асырылуда. Жыл басынан бері өңірлерде 137 мың оқушы орнына арналған 165 мектеп есігін айқара ашты. Бұл еліміздің 113 елді мекенінде оқушы орындарының тапшылығы мәселесін шешуге мүмкіндік берді. Тек Түркістан облысы бойынша биыл 20 жаңа мектеп ашылды. Өңір басшылығына оқу-ағарту саласын ерекше назарға алғаны үшін алғысымды білдіремін» Ғани Бейсембаев
Айта кетейік, жаңа лицей қажетті оқу базасымен, заманауи пәндік кабинеттермен, зертханалармен және жатақханамен толық жабдықталған. Онда 700 түркістандық бала білім алады.
Биылғы жылы өңірде 10 мың оқушыға арналған 33 мектептің құрылысы басталды. Оның 13-і пайдалануға берілді, тағы 7-уі осы жылдың соңына дейін іске қосылады.
Бұдан басқа, жеке инвестициялар есебінен 6 320 оқушыға арналған 35 мектеп ашу жоспарлануда.
Источник: dknews.kz
