Жобаның мақсаты – кәсіпкерлерге түрлі әкімшілік кедергілерді еңсеруге көмек көрсету
Астана қаласы бойынша сыбайлас жемқорлыққа қарсы қызмет департаментінің бастамасымен Есіл ауданы әкімінің аппаратында Департаменттің бірінші орынбасары Ілияс Базиловтың төрағалығымен шағын және орта бизнес өкілдерімен кездесу өтті, деп хабарлады Elorda.info.
Кездесудегі негізгі күн тәртібі – «Бизнеске жол» республикалық жобасын талқылау.
Жобаның мақсаты – кәсіпкерлерге түрлі әкімшілік кедергілерді еңсеруге көмек көрсету, құжаттарды ресімдеу кезінде бюрократиялық процестерді азайту, сондай-ақ мемлекеттік қызметтер көрсету мерзімдерінің сақталуын қамтамасыз ету.
Бұл жоба кәсіпкерлердің жер учаскелеріне рұқсат беру құжаттарын ресімдеу және алу, коммуникацияларды жүргізу және қосу, сондай-ақ мемлекеттік қолдаудың түрлі шараларын – субсидиялар, кредиттер және т.б. алу кезінде кездесетін нақты проблемаларды шешуге бағытталған, — деп атап өтті Ілияс Базилов.
Кездесуде айтылғандай, қазіргі уақытта өңірлерде бизнес-өтінімдерді қабылдау үшін арнайы алаңдар мен байланыс арналары жұмыс істейді. Әлеуметтік желілер белсенді қолданылады – аймақтық филиалдардың басшылары Facebook-тегі бизнес өкілдерімен тікелей кері байланысты қолдайды. Сонымен қатар, кәсіпкерлердің сұрақтары мен шағымдары Антикор колл-орталығында 1424 нөмірі бойынша қабылданады.
Кездесу соңында кәсіпкерлер өз сұрақтарын қойып, «Бизнеске жол» жобасы бойынша ұсыныстарын айтты.
Источник: kaz.elorda.info
