3245 rob
Фотосурет: Gov
Қазақстанның БҰҰ жанындағы Женевадағы Тұрақты өкілдігі «Әлем дәрігерлері ядролық соғыстың алдын алу үшін» ұйымымен бірлесе отырып, Ұлттар сарайында «Ядролық сынақтардың денсаулыққа әсері» атты арнайы іс-шара ұйымдастырды, деп хабарлайды DKnews.kz.
Бұл жиын 1991 жылы Семей ядролық полигоны жабылған күні аталып өтетін Ядролық сынақтарға қарсы іс-қимылдың халықаралық күніне орай өткізілді.
Іс-шара Қазақстан мен IPPNW-нің ядролық қарусыз әлемді қорғауға және ядролық сынақтар нәтижесінде туындайтын денсаулық сақтаудың маңызды мәселелерін көтеруге деген тұрақты міндеттемесін атап өтті.
Қазақстанның Тұрақты өкілі Ерлан Әлімбаев өзінің сөзінде еліміздің жаһандық бейбітшілік пен қауіпсіздікті ілгерілету және ядролық сынақтардың денсаулыққа тигізетін зардаптарын жою ісіне бейілділігін растады. Ядролық сынақтардың салдарынан қатты зардап шеккен ел ретінде Қазақстан ядролық әділеттілік ісін барлық көпжақты форумдарда, оның ішінде Ядролық қаруды таратпау туралы шарттың қолданылуын қарау жөніндегі шолу конференциясы мен Дайындық комитеттері, Ядролық қаруға тыйым салу туралы шарттың кездесулерінде, БҰҰ Бас Ассамблеясында, Қарусыздану жөніндегі конференцияда және БҰҰ Қарусыздану жөніндегі комиссиясы алаңдарында қорғап келеді.
БҰҰ Женевадағы бөлімшесі Бас директоры кеңсесінің басшысы Лидия Григорьева өз сөзінде БҰҰ-ның ядролық сынақтардың жойқын салдары туралы хабардарлықты арттыруға бағытталған бастамаларды қолдайтынын білдіріп, ядролық қарусыздану ісін ілгерілетудегі халықаралық ынтымақтастықтың маңыздылығын атап өтті.
Іс-шарада Аустрия Тұрақты өкілдігінің, Дүниежүзілік денсаулық сақтау ұйымының (ДДСҰ), Халықаралық Қызыл Крест комитетінің (ХҚКК), БҰҰ қарусыздану жөніндегі басқармасының және IPPNW өкілдері баяндамалар жасады. Олар ядролық сынақтардың денсаулыққа әсерін, ядролық қарудың гуманитарлық салдарын және болашақ сынақтардың алдын алу бойынша жаһандық іс-қимылдың шұғыл қажеттілігі туралы ойларымен бөлісті.
Сонымен қатар, ҚР Тұрақты өкілдігі Женевадағы БҰҰ алаңында 2024 жылғы 5 қыркүйекке дейін жалғасатын Ядролық сынақтарға қарсы іс-қимылдың халықаралық күніне орайластырылған фотокөрме ұйымдастырды.
1945 жылы 16 шілдеде ядролық қаруды сынау басталғаннан бері бүкіл әлемде 2000-нан астам сынақ жүргізілді, бұл қоршаған орта мен денсаулыққа айтарлықтай әсер етті. 460-тан астам ядролық сынақ жүргізілген Қазақстандағы Семей сынақ полигоны осындай сынақтардың ұзақ мерзімді салдарының ең қайғылы мысалдарының бірі болып қала береді.
БҰҰ Бас Ассамблеясы 2009 жылы Ядролық сынақтарға қарсы іс-қимылдың халықаралық күнін 64/35 қарармен жариялады. Бұл күн жыл сайын 29 тамызда атап өтіліп, ядролық сынақтардың жойқын әсерін және ядролық қаруды жоюдың шұғыл қажеттілігін еске салады.
Қазақстанның қарусыздану және ядролық қаруды таратпау саласындағы күш-жігері кеңінен құжатталған және халықаралық деңгейде танылған. 1991 жылы Қазақстанның бастамасымен Семей полигонының жабылуы ядролық қарудан азат әлемге апаратын тарихи қадам болды. Содан бері Қазақстан жаһандық ядролық қарусыздануды, оның ішінде 2015 жылы БҰҰ Бас Ассамблеясы қабылдаған Ядролық қарудан азат әлем құру туралы жалпыға бірдей декларация және Орталық Азиядағы ядролық қарудан азат аймақ сияқты бастамалар арқылы дәйекті түрде жақтап келеді.
Источник: dknews.kz
