547 Арман
Құрамында Қазақстан Республикасының Италиядағы Елшісі Е.Сембаев, «Kazakh Invest» ҰК» АҚ басқарма төрағасы М.Юсупов және «Бәйтерек» ҰБХ» АҚ төрағасының бірінші орынбасары Н.Айдапкелов бар қазақстандық делегация Италияның солтүстігінде Ломбардия және Эмилия-Романья аймақтарында орналасқан Пьяченца, Лоди және Парма қалаларына сапармен барды, деп хабарлайды DKNews.kz.
Сапар барысында аталған қалалардың өкілдерімен, жергілікті компаниялардың басшыларымен кездесулер өтіп, Қазақстанның инвестициялық және туристік әлеуеті жөнінде толық ақпарат берілді, бірлескен бизнес жобаларды жүзеге асыру мүмкіндіктері талқыланды. Ауыл шаруашылығы, тамақ өнеркәсібі, сауда, инвестиция және туризм сияқты салалардағы ынтымақтастықты кеңейтудің маңыздылығы атап өтілді.
Өз кезегінде итальяндық кәсіпкерлер қазақстандық әріптестерін агроөнеркәсіптік, мұнай-химия және азық-түлік өнімдерін, газ және энергетика салаларына арналған өнімдерді шығарумен айналысатын жергілікті кәсіпорындардың жұмысымен таныстырды.
Мысалы, Ломбардия өңіріндегі Лоди қаласында қазақстандық делегация «Cremonini Group» компаниясының ет өндіру және өңдеу зауытында болды. 1963 жылы негізі қаланған компания 50-ден астам елде жұмыс істейді. 2021 жылы компанияның айналымы 4 млрд еуродан асты. «Cremonini» тобына «Inalca», «Marr», «Montana», «IBIS», «ChefExpress», «Road House» сияқты компаниялар кіреді. Компания және сиыр еті, гамбургер өндірісінде Италияда көшбасшы орында және ең ірі еуропалық ойыншылардың бірі, ет консервілерінің ең ірі итальяндық өндірушісі.
Пьяченца қаласына сапар барысында Қазақстан өкілдері «Allied International» компаниялар тобының құбырлар, фитингтер, фланецтер және басқа да өнімдер шығаратын зауытында болды. Компания бүгінде атом және жылу энергетикасында, мұнайды, газды және суды құбырлар арқылы тасымалдау, теңізде және құрлықтағы бұрғылау платформаларында, мұнай-химия зауыттарында қолдануға арналған түйіспе дәнекерлеу арматурасының барлық түрлерін өндіруде әлемдік көшбасшы.
Сапар соңында қазақстандық делегация Парма қаласында болып, онда агроөнеркәсіп өнімдерін өндірумен айналысатын «Пармалат» компаниясының қызметімен танысты.
Источник: dknews.kz
