406 Арман
Еуразиялық даму банкі (ЕАДБ) 2023 жылғы 15-17 мамырда Алматыда инфрақұрылымдық және ESG-жобаларға ірі инвесторлар конференциясын, сондай-ақ Азия және Тынық мұхиты өңірін дамыту институттары қауымдастығы (ADFIAP) қатысушыларының кездесуін өткізеді, деп хабарлайды DKNews.kz.
Арнайы сессияда Қазақстанның және Орталық Азия елдерінің инвестициялық әлеуеті мен жобалары әлемнің ең жылдам дамып келе жатқан өңірі ретінде ұсынылатын болады.
«Біз осындай кең ауқымды инвесторлар үшін Қазақстанның және бүкіл Орталық Азияның мүмкіндіктерін ашуға қуаныштымыз. Бұл іс-шара ұлттық және халықаралық даму институттарының күш-жігерін біріктіру, жобаларды іске асыру тәжірибесімен алмасу, жаңа байланыстар орнату және тұрақты қаржыландыру саласындағы ынтымақтастықты кеңейту мүмкіндігі екеніне сенімдімін» ЕАДБ Басқарма төрағасы Николай Подгузов
Іс-шаралар сериясы шеңберінде ұлттық және өңірлік деңгейлерде тұрақты әлеуметтік-экономикалық дамуда шешуші рөл атқаратын көлік, байланыс, энергетика және цифрлық инфрақұрылым объектілерін қаржыландыру мәселелері талқыланатын панельдік сессиялар өтеді. Іс-шараға тұрақты инфрақұрылымды құруда маңызды рөл атқаратын және осы кездесуге мұрындық болатын даму институттары мен инвестициялық қорлардың 150-ден астам басшылары, басқарма мүшелері, жоғары лауазымды тұлғалар және өкілдері қатысады. Ең алдымен, бұл Қытай, Түркия, Жапония, Үндістан, Африка, Филиппин, Еуропалық Одақ елдері, АҚШ, Латын Америкасы және Таяу Шығыстың қаржы институттары, сондай-ақ UNIDO, UNDP және т. б. сияқты БҰҰ құрылымдарын қоса алғандағы халықаралық ұйымдар болмақ.
Еуразиялық Даму Банкі (ЕАДБ) — еуразиялық кеңістікте инвестициялық қызметті жүзеге асыратын халықаралық қаржы ұйымы. 17 жылдан астам уақыт бойы ЕАДБ экономикалық байланыстарды нығайтуға және кеңейтуге және қатысушы елдердің жан-жақты дамуына жәрдемдесіп келеді. ЕАДБ жарғылық капиталы 7 млрд АҚШ долларын құрайды. ЕАДБ портфеліндегі негізгі үлесті көлік инфрақұрылымы, цифрлық жүйелер, жасыл энергетика, ауыл шаруашылығы, өнеркәсіп және машина жасау салаларындағы интеграциялық әсері бар жобалар алады. Банк өз қызметінде БҰҰ-ның Тұрақты даму мақсаттарын және ESG қағидаттарын басшылыққа алады.
Источник: dknews.kz
