205 rob
Қазақ-мажар «Барс» қоры Абай орталығымен бірлесе отырып, Қазақстан Республикасының Мажарстандағы Елшілігінің қолдауымен Мажарстанда Қазақ мәдениеті күнін өткізді, деп хабарлайды DKNews.kz.
Іс-шараға Елші Жәнібек Әбдрашов, Қазақ-мажар «Барс» қорының президенті Андраш Гал, Абай орталығы мен қазақ диаспорасының жетекшісі Оңғайша Мандоки, Түркі мемлекеттері ұйымының Мажарстандағы өкілдігінің басшысы Янош Ховари, «Еуразиялық бірлік» қорының президенті Иштван Бенце, Назарбаев университетінің қазақ тілі және түркітану кафедрасының профессоры, түрколог Давид Шомфай Қара, қазақ диаспорасының өкілдері, студенттер және мажар достары қатысты.
Құттықтау сөзінде Андраш Гал 25 жылдан астам Қазақстан мен Мажарстан арасындағы ғылыми және мәдени байланыстарды дамытып келе жатқан қордың қызметі туралы айтты.
Қазақстан Елшісі бұл іс-шараның қазақ диаспорасы, сондай-ақ Мажарстандағы жоғары оқу орындарында білім алып жатқан жастар арасында қазақтың салт-дәстүрі мен әдет-ғұрпын нығайтуға бағытталғанын атап өтті.
Қонақтарға «Тұсау кесу», «Беташар», «Қыз қуу» сияқты салт-дәстүрлер мен ұлттық музыкасының «күй», «күй-тартыс», «терме» сияқты негізгі жанрлары таныстырылды. Сонымен қатар мажар музыканттары Тамаш Палчо мен Төрөк Тилла «Көзімнің қарасы», «Қуаныш вальсі» сынды қазақ әндерін, сондай-ақ мажар халқының «Вирагом – гүлім» әнін домбырамен орындады.
Мажар достар қазақтың аспаздық дәстүрлерімен танысты. Іс-шара соңында қонақтар мерекелік дастарханнан ұлттық тағамдардың дәстүрлі тағамдарынан дәм татты.
Источник: dknews.kz
