366 Арман
Қазақстанға Вестленд муниципалитетінің мэрі Бауке Арендс бастаған Нидерландылық компаниялар делегациясы мемлекеттік және жеке сектор өкілдерімен келіссөздер жүргізу үшін келді. 2 сәуірде келген делегация құрамында негізінен ауыл шаруашылығы саласында жұмыс істейтін 22 компания бар. «KAZAKH INVEST» ҰК» АҚ қолдауымен Қазақстанның Нидерландыдағы Елшілігі мен Dutch Greenhouse Delta ұйымдастыруымен өткен сапар аясында Ақтөбе, Алматы және Қонаев қалаларында инвестициялық іс-шаралар жүргізілді, деп хабарлайды DKNews.kz.
Сапар Қазақстан мен Нидерланды арасындағы ауыл шаруашылығы саласындағы ұзақ мерзімді қарым-қатынастарды нығайту мен дамытуға және екі елдің азық-түлік қауіпсіздігін қамтамасыз етуге бағытталған.
Нидерланд делегациясының құрамында Koppert, Grodan, Food Ventures, Dutch Greenhouse Delta, Boal Group және т.б. ірі компаниялар болды.
Қазақстан мен Нидерланды арасындағы экономикалық қатынастар қарқынды дамып келеді. Қазақстан экономикасына тікелей инвестиция тарту бойынша Нидерланды бұрыннан көш бастап келеді. Мәселен, 2022 жылдың соңында Қазақстанға Нидерландыдан инвестиция ағыны 8,3 млрд долларды құрады, бұл өткен жылмен салыстырғанда 18%-ға жоғары. Жалпы, 2011 жылдан бері «қызғалдақтар елі» 85,7 миллиард доллар инвестициялаған.
Ақтөбеде бизнес қауымдастық, қаржы институттары мен мемлекеттік ұйымдардың қатысуымен «Қазақстандағы жылыжайды дамыту: табыс тарихы және бизнестің қазіргі мүмкіндіктері» атты конференция өтті. Қатысушылар саны 100 адамнан асты.
Қатысушылар «Өсімдіктерді өсіру және көбейту», «Салауатты өсімдіктер – субстрат», «Өсімдіктерді биологиялық қорғау және қоректік заттар», «Жылыжай құрылысы», «Су ресурстарын басқару», «Климатты бақылау, энергия және жарықтандыру», «Автономды өсіру» сияқты тақырыптар бойынша жетекші Нидерландылық ауыл шаруашылығы өндірушілерінің баяндамаларын талқылап, тыңдай алды.
Алматы қаласында Қазақстан-Нидерланд дөңгелек үстелі «Protected ground of Kazakhstan-2023. Economics in greenhouses, IT and AI» 150-ден астам қатысушыны жинады. Іс-шараны Алматы облысы әкімінің орынбасары Арслан Дандубаев ашып, Нидерландтық компаниялардың бұл сапары экономикалардың өзара дамуын қамтамасыз етуге елеулі үлес қосады, жұмыс үшін жағдайларды әртараптандыруға және жеңілдетуге, сондай-ақ екі елдің бизнесі үшін жақсы жағдайлар жасауға көмектеседі деген үмітін білдірді.
Вестленд муниципалитетінің мэрі Бауке Арендс әлем елдері үшін азық-түлік қауіпсіздігінің маңыздылығы туралы айтып, егін өнімділігін арттыру үшін қазақстандық фермерлермен тәжірибе алмасуға дайын екенін мәлімдеді. Оның айтуынша, Нидерландыдан 65 есе үлкен Қазақстанның жылыжай шаруашылығын дамытуға әлеуеті зор.
Dutch greenhouse Delta директорының міндетін атқарушы Мирьям Букестайн «Күш Бірлікте. Қазақстан мен Нидерланды әлемді қалай бірге тамақтандыра алады» атты презентация өткізді.
Сапар барысында Нидерландылық делегация Алматы қаласының әкімі Ерболат Досаевпен, сондай-ақ Ақтөбе және Алматы облыстарының әкімдері Ералы Тоғжанов және Марат Сұлтанғазиевпен кездесулер өткізді.
Жалпы Нидерландылық делегацияның Қазақстанға сапары екі ел арасындағы, әсіресе ауыл шаруашылығы саласындағы экономикалық қатынастарды нығайтуға ықпал етті. Ақтөбе және Алматы қалаларында өткізілген инвестициялық іс-шаралар жемісті пікірталастар мен ұзақ мерзімді әріптестік қатынастар орнату алаңына айналды.
Источник: dknews.kz
