үй Қазақстан жаңалықтары 10 мың шақырымнан астам автожол құрылыс жұмыстарының барлық түрімен қамтылады

10 мың шақырымнан астам автожол құрылыс жұмыстарының барлық түрімен қамтылады

27
0

176 rob

10 мың шақырымнан астам автожол құрылыс жұмыстарының барлық түрімен қамтылады

Осы жылы еліміздегі автомобиль жолдарының құрылыс және жаңғырту жұмыстарымен қамтылуы 10,5 мың шақырымға дейін жетеді. Бұл туралы ведомствоның кеңейтілген алқа отырысында ҚР Индустрия және инфрақұрылымдық даму вице-министрі Алмаз Ыдырысов айтты, деп хабарлайды DKNews.kz.

Оның айтуынша, биыл республикалық жолдардың желісі бойынша 7,3 мың шақырымға, сондай-ақ жергілікті желіде 3,2 мың шақырым жолды салып, жаңғырту жоспарланып отыр.

Айта кету керек, қазір еліміздің шығыс өңірінде «Талдықорған – Өскемен», «Қалбатау-Майқапшағай», «Үшарал – Достық» сынды ірі автожол жобалары жүзеге асырылып келеді. Биыл 180 шақырымға жететін «Үшарал – Достық» учаскесінде тиісті жұмыстарды толық аяқтау көзделген. Қалған учаскелер бойынша жаңа жабын арқылы жол қозғалысын ашу 2024 жылға межеленіп отыр.

Вице-министр «Қызылорда – Жезқазған» учаскесіндегі құрылыс туралы айта келе, биыл Ұлытау облысындағы жол учаскесінде тиісті жұмыстар басталатынын атап өтті. Сондай-ақ «Жезқазған – Қарағанды» жобасы бойынша да құрылыс жұмыстары басталатыны белгілі болды.

Мемлекет басшысының тапсырмасына сәйкес былтырғы желтоқсан айында министрлік Қазақстан Республикасының көлік-логистикалық әлеуетін дамытудың 2030 жылға дейінгі тұжырымдамасын бекіткенін айта кеткен жөн. Бұл саланы одан әрі дамытып, алдағы іс-қимылды айқындайтын негізгі құжат саналады. Еліміздің транзиттік әлеуетін арттыру үшін былтыр теміржол саласындағы ірі инфрақұрылымдық жобалар жүзеге асырыла бастағанын айта кетейік. Атап айтқанда, 2022 жылдың қараша айында теміржол көлігі саласындағы ірі жобалардың бірі – «Достық-Мойынты» теміржол учаскесінің екінші торабының құрылысы басталған болатын.

Источник: dknews.kz