166 rob
Астана қаласының әкімі Жеңіс Қасымбек Instagram парақшасында Байқоңыр ауданының тұрғындарымен кездескенін мәлім етті, деп хабарлайды елорда әкімдігінің ресми сайты, деп хабарлайды DKNews.kz.
«Байқоңыр ауданының тұрғындарымен кездестім. Кездесуіміз 5 сағаттан аса уақытқа созылды, ниет білдірген кез келген адам сұрақтарын қойды. Кездесуіміз тікелей эфир арқылы да көрсетілді.
Негізгі проблемалардың бірі – апатты күйдегі тұрғын үйлерді бұзу. Қазіргі уақытта қалада мұндай 200-ден аса үй бар. Біз тізімді жаңартамыз, осылайша апатты үйлердің саны да артады. Оларды бұзу кестесін жасаймыз. Алдағы 3 жылда апатты, тозығы жеткен үйлердің тұрғындарына арнап 2,5-3 мың пәтер салуды жоспарлап отырмыз.
Тағы бір маңызды мәселелердің бірі – инженерлік инфрақұрылым салу. Қалада тіршілікті қамтамасыз ету жүйелеріне арналған нысандар салып жатырмыз, олар қалаға жылумен жабдықтау, сумен жабдықтау, электр және т.б. бойынша қосымша күш береді.
Сол сияқты әлеуметтік нысандар салуды жалғастырамыз: алдағы оқу жылында 13 мектеп саламыз, оның бір бөлігі Байқоңыр ауданында орналасады. Сондай-ақ жеңілдікпен берілетін қолжетімді тұрғын үй, медициналық орталықтар, спорт орталықтары және т.б. саламыз.
Кездесу барысында тұрғын үй кешендерін жаңғырту, құрылысы ұзаққа созылған нысандарды аяқтау, аулалар мен қоғамдық кеңістіктерді (саябақтар, гүлзарлар) абаттандыру, жолдар мен тротуарлар салу, жарықтандыру жүргізу, қосымша автобустарды іске қосу және т.б. проблемалар қозғалды. Көтерілген мәселелерді орындау бойынша кесте жасаймыз: олардың бір бөлігі биыл шешіледі, ал өзгелерін келесі жылға жоспарлаймыз.
Мұндай кездесулерді тұрақты түрде өткізетін боламыз, барлық аудандар мен елді мекендердің тұрғындарымен кездесеміз. Сонымен қатар апта сайын азаматтарды қабылдауды жалғастырамын», — деп жазды елорда әкімі.
Источник: dknews.kz
