605 Арман
Жыл соңында аймақтың тағы 50 жас тұрғыны жаңа бизнес құруға немесе жұмыс істеп тұрған бизнесін кеңейтуге мүмкіндік алды. Олардың бизнес-идеялары Қарағанды облысы әкімінің жастар кәсіпкерлігін дамытуға және қолдауға арналған гранттар байқауында жеңіске жетті, деп хабарлайды Деловой Қазақстан.
Конкурсқа қатысуға 300 өтінім берілді. Арнайы комиссия ең өзекті 50 бизнес-жобаны таңдап алды. Олардың авторлары әрқайсысы 2 млн теңгеден алды.
Қарағанды облысының әкімі Ермағанбет Бөлекпаев Жастар ісі жөніндегі кеңестің отырысы кезінде бизнесін жаңа бастаған және жұмыс істеп жатқан жас кәсіпкерлерге алғашқы 10 грантты табыс етті.
Облыс жастары металл конструкциялар мен жиһаз өндірісінен бастап медициналық, білім беру және құрылыс қызметтерін көрсетуге дейінгі түрлі салаларда өздерін сынап көреді.
Осакаров ауданының тұрғыны Мейремхан Төлеубай атасынан ұлттық музыкалық аспаптар жасау шеберлігін игерген. Грантқа жас кәсіпкер қажетті құрал-жабдықтар сатып алып, болашақта шеберхана ашпақшы. Әзірге Мейремхан үйіне жапсарлас салынған бөлмеде жұмыс істейді.
Менің басты мақсатым – ұлттық қолөнерді дамыту. Ежелгі заманнан бері қазақтар музыкалық аспаптар, ыдыс-аяқ, кәдесыйлар, сандықтар және т.б. жасаумен айналысқан. Маған үш домбыра жасау үшін бір ай қажет. Станоктардың көмегімен дәл осы мерзімде 10 музыкалық аспап жасауға болады. Мен ағаш өңдеу жабдықтарын сатып алуға ақша жұмсаймын, киім тігумен де айналысамын, сондықтан тігін машинасы қажет. Грант маған өз мамандығымды дамытуға мүмкіндік береді. Мейремхан Төлеубай
Нұра кентінің тумасы Шыңғыс Қадырбаев төрт ай бұрын кір сабын шығаратын цех ашты. Жаңадан бастаған кәсіпкердің айтуынша, оның жуғыш заты сапасы жағынан ТМД елдеріндегі өнімнен кем түспейді, жәнеде олардан әлдеқайда арзан. Сабын Қарағанды және Ақмола облыстарында сұранысқа ие.
Әкем маған осындай бизнеспен айналысуға кеңес берді. Бізде тұрмыстық химия дүкені бар. Біз барлық шетелдік өнімдердің қалай бағаланатынын көреміз. Неліктен кір сабынды өзімізге жасамасқа деп ойладық, өйткені бұл күнделікті тұтыну өнімі. Нарықты зерттеп, цех сала бастадық. Содан кейін мен несие алып, жабдық сатып алдым. Жұмыспен қамту орталығы арқылы екі адамды жұмысқа орналастырдым. Грант қаражатын өз бизнесімді кеңейтуге жұмсаймын, қосымша станоктар сатып аламын. Шыңғыс Қадырбаев
Қарағанды медициналық университетінің үшінші курс студенті Гүлмира Төрежанова алғашқы көмек көрсету бойынша оқу орталығын ашуды жоспарлап отыр. Ол төтенше жағдайда сауатты және уақтылы көмек көрсету өмірді сақтап қалатынын жақсы біледі.
Статистикаға сәйкес, 70 % жағдайда өлімнің себебі дәрігерге дейін алғашқы медициналық көмек көрсетудің жеткіліксіздігімен, яғни «алтын уақытты» өткізіп алумен байланысты. Әр адам төтенше жағдайларда медициналық көмек көрсете білуі керек. Гранттар конкурсына қатысуымның себебі – қоғамға пайда әкелетін іспен айналысуға, білуге, үйренуге, ата-ананың үмітін ақтайтын бала болуға, өз елінің мақтанышына айналатын азамат болуға деген ұмтылыс. Гүлмира Төрежанова
Ермағанбет Бөлекпаев жас кәсіпкерлерге барлық жоспарларын жүзеге асыруды тіледі.
Источник: dknews.kz
