175 rob
Фотосурет: Астана қаласының әкімдігі
Қазіргі уақытта елордалық Урбанистика орталығы мен қала әкімдігі Астананы көгалдандыру бойынша жарғы әзірлеп жатыр. Бұл туралы елорда әкімдігінің ресми сайты хабарлады.
Жарғы барлық инстанциялар, оның ішінде өнеркәсіптік және коммерциялық объектілер, тұрғын үй кешендері, сауда және бизнес-орталықтар өкілдері тарапынан сапалы көгалдандыру және осы саладағы мәселелерге ерекше назар аудару құралы болады. Құжатта көгалдандыру жұмысына ережелер, талаптар, нормалар мен ұсыныстар жазылады, деп хабарлайды DKNews.kz.
«Мұндай құжат көгалдандыру жоспарын жүйелеуге мүмкіндік береді, көшелерді, кварталдарды, ішкі аула кеңістіктерін көгалдандыру бойынша стратегиялық көзқарас қалыптасады. Біз озық тәжірибелердің бәрін зерттедік, енді оны қолданысқа енгізгіміз келеді. Біз бәріне, яғни дизайнерлерге, құрылыс салушыларға, коммерциялық, өнеркәсіптік нысандарға негіз болатын құжаттан бастауды жоспарлап отырмыз. Мысалы, өнеркәсіптік нысандардан ең үлкен эмиссия бар, бірақ онда көгалдандырудың сапасы жоқ. Сондықтан өнеркәсіп нысандарының да көгалдандыруға белсенді араласуы өте маңызды», — деді қалалық ғылым орталығының басшысы Елнар Базыкен.
Оның айтуынша, көптеген құрылыс салушылар абаттандыруға көңіл бөлмей, өз нысандарын тапсыруға ғана асығады. Ал жарғы бұл жұмысты көгалдандыру тұрғысынан реттеуге мүмкіндік береді. Бұл өнеркәсіптік, сондай-ақ ірі инфрақұрылымдық нысандарға – вокзалдарға, әуежайларға қатысты болады.
«Биыл бір миллионнан астам жасыл кеңістік отырғызылды. Оның ішінде 100 мың жасыл желекті біздің құрылыс салушылар отырғызды. Біз қаланың көгалдандыру жұмысын жүйелеуге мүмкіндік беретін жарғы қабылдауды және келесі жылы бұл көрсеткішті одан әрі арттыруды жоспарлап отырмыз. Қалада миллионнан астам жасыл желек отырғызуға тырысамыз», — деді Елнар Базыкен.
Қаланы көгалдандыру бойынша ұсыныстар мен идеяларды тұрғындар Урбанистика орталығының centerofurbanism@gmail.com поштасына жібере алады.
Ұсыныстар өңделіп, ескеріледі.
Источник: dknews.kz
