419 Арман
Фотосурет: Shutterstock
Дүниежүзілік сауда ұйымы (ДСҰ) және халықаралық экономикалық ұйымдар жанындағы Қазақстан Республикасының Тұрақты өкілі Жанар Айтжан АҚШ-тың ДСҰ-дағы сауда саясатының он бесінші шолуы барысында сөз сөйледі, деп хабарлайды Деловой Қазақстан.
Өз сөзінде Тұрақты өкіл Ж.Айтжан Қазақстан мен АҚШ арасындағы экономикалық қатынастардың жоғары деңгейін ерекше атап өтті. Атап айтқанда, ол Қазақстан мен АҚШ арасындағы өзара тауар айналымының тұрақты өсімін және 2022 жылдың 10 айының қорытындысы бойынша 2,8 млрд АҚШ долларын құрап, 2021 жылдың ұқсас кезеңімен салыстырғанда 46%-ға ұлғайғанын айта кетті.
АҚШ еліміздің екінші ірі инвесторы болып табылады және АҚШ компаниялары тарапынан Қазақстан экономикасына тікелей инвестициялар көлемі соңғы отыз жылда 60 млрд АҚШ долларынан асты. Қазақстанда американдық капиталдың қатысуымен 500-ден астам компания табысты жұмыс істейді.
Сонымен бірге, Тұрақты өкіл Қазақстан Президенті Қасым-Жомарт Тоқаевтың 2022 жылғы қыркүйекте АҚШ-қа сапары барысында американдық бизнес өкілдерімен вакциналар мен медициналық жабдықтар өндірісін оқшаулау, цифрландыру, электр энергиясын өндіру объектілерін дамыту және т. б. бойынша бірқатар жаңа инвестициялық жобаларды іске асыру туралы уағдаластыққа қол жеткізілгенін айтты.
Ж.Айтжан сондай-ақ сауда рәсімдерін жеңілдетуге, кедендік рәсімдерді жаңғыртуға, «Бірыңғай терезе» жүйесін дамытуға, зияткерлік меншік құқықтарын бұзу фактілерінің санын азайтуға және т.б. бағытталған АҚШ экономикалық саясатының түрлі салаларында жүргізіліп жатқан негізгі реформаларды жоғары бағалады.
Сонымен қатар, Қазақстан өкілі АҚШ тарапынан Преференциялардың бас жүйесінің бағдарламасын қолдануды қайта бастау және қазақстандық тауарларға қатысты қолданыстағы сауда шараларын жою, сондай-ақ болат пен алюминийге импорттық баждардың жоғары деңгейін төмендету сияқты екіжақты сауданың өзекті мәселелерін қозғады.
Ж.Айтжан АҚШ әлемдегі ең ірі экономика бола отырып, ДСҰ шеңберіндегі ағымдағы келіссөздерді белсенді түрде ілгерілетуді және ДСҰ органының дауларды шешу жөніндегі жұмысын қалпына келтіру контекстінде көпжақты сауда жүйесінің қағидаларын нығайтуды жалғастыратынына үміт білдірді.
Жалпы, іс-шара барысында ДСҰ-ға мүше 50-ден астам елдің делегацияларының басшылары сөз сөйледі, бұл Ұйым шеңберінде сауда саясатын мониторингтеу мен шолудың маңыздылығын көрсетеді.
Источник: dknews.kz
