221 rob
Фотосурет: ҚР СІМ
Қазақстан Республикасы Сыртқы істер министрінің орынбасары Әлібек Бақаев Ашхабадта Халықаралық бейтараптық күнін мерекелеу аясында гибридті форматта өткен Бейбітшілік, қауіпсіздік және орнықты даму жолындағы бейтараптық Достар тобының кездесуіне қатысты, деп хабарлайды DKNews.kz.
Түрікменстан Үкіметін бейтарап мәртебенің 28 жылдығымен құттықтаған қазақстандық дипломат 2017 жылғы ақпанда БҰҰ Бас Ассамблеясы бекіткен 12 желтоқсанды Халықаралық бейтараптық күні деп жариялау жөніндегі түрікмен тарапының табысты бастамасын жоғары бағалады.
«Бүгінде Түркіменстанның оң бейтараптығы біздің өңірдегі бейбітшілік пен тұрақтылықты нығайтуға, сондай-ақ мемлекетаралық диалогты дамытуға маңызды үлес қосуда» Әлібек Бақаев
Сонымен қатар, қазақстандық дипломат қауіпсіздік пен орнықты даму саласындағы сын-қатерлерді шешуге бағытталған Орталық Азия өңіріндегі көптеген жасампаз процестерді жалғастырудың маңыздылығын атап өтті. Осы тұрғыда ол Қазақстанның Алматы қаласында Орталық Азия және Ауғанстан үшін орнықты даму жөніндегі БҰҰ Өңірлік орталығын құру жөніндегі бастамасының өзектілігін атап өтті.
Бейбітшілік, қауіпсіздік және орнықты даму жолындағы бейтараптық достарының тобы 20-дан астам елден тұратын бейресми бірлестік болып табылады, оның ішінде Қазақстан және 2020 жылдан бастап Түркіменстанның бастамасымен жұмыс істейді. Топтың қызметі пікір алмасуға және халықаралық диалогты нығайтуға бағытталған.
Источник: dknews.kz
