260 Awrora
Қазақстан Республикасы Сыртқы істер министрінің орынбасары Әділ Тұрсынов Түркі мәдениеті және мұрасы қорының президенті Гюнай Эфендиевамен кездесу өткізді, деп хабарлайды Деловой Қазақстан.
Кездесу барысында Ә. Тұрсынов Қордың түркі мәдениеті мен мұрасын зерделеудегі және ілгерілетудегі маңызды рөлін атап өтті, сондай-ақ Түркі мемлекеттері ұйымының бұл құрылымының белгіленген жобаларын іске асыруға жан-жақты жәрдем көрсетуге дайын екендігін айтты.
Г. Эфендиева Қордың алдағы жылға арналған жоспарларымен бөлісті және мүше мемлекеттермен бірлесіп жүргізіліп жатқан жұмыстар туралы хабардар етті.
Түркі мәдениеті және мұрасы қоры 2012 жылғы 23 тамызда Әзербайжан Республикасының бастамасымен құрылды. Қор Хатшылығы Баку қаласында (Әзербайжан) орналасқан. Қазіргі уақытта Қорға Әзербайжан, Қазақстан, Қырғызстан және Түркия кіреді. Қордың негізгі міндеттері – түрлі іс-шараларды, жобалар мен бағдарламаларды қолдау және қаржыландыру арқылы түркі мәдениеті мен мұрасын қорғау, зерделеу және ілгерілету.
Источник: dknews.kz
