432 Арман
2022 жылғы 12 желтоқсанда Малайзия астанасында «Kazakhstan: Land of Opportunities» атты іскерлік форумы өтті, деп хабарлайды Деловой Қазақстан.
«Kazakh Invest» ҰК» АҚ, «Астана» Халықаралық Қаржы Орталығы, «QazTrade» АҚ және Малайзияның халықаралық сауда және индустрия министрлігі жанындағы «MATRADE» сауданы ілгерілету агенттігінің Алматыдағы өкілдігі онлайн режимде іскерлік форум қатысушыларына Қазақстанның инвестициялық ахуалы мен іскерлік мүмкіндіктері туралы презентациялар өткізді.
Офлайн форматта «MATRADE» агенттігінің басшылығы, сондай-ақ Қазақстанда бизнес жүргізетін бірқатар компаниялардың басшылары баяндама жасады.
«MATRADE» агенттігінің өкілі Изам Абдул Хамид елдеріміз арасында дипломатиялық қатынастардың 30-жылдығын атап өтті. 2021 жыл нәтижесі бойынша екі ел арасындағы сауда айналымы 480 млн. АҚШ долларына жетіп, пандемиядан кейін қалпына келіп жатқанына назар аударды. Ол Қазақстанның жеке нарық ретінде ғана емес, өңірлік хаб ретінде де маңыздылығын атап өтіп, мұнай-газ және аэроғарыш салаларындағы Қазақстан тәжірибесін ерекше атап өтті. «MATRADE» спикерлері «Астана» ХҚО артықшылықтарына да жеке тоқталды.
Іскер топтардың өкілдері инвестициялық және салықтық жеңілдіктерді, сондай-ақ арнайы экономикалық аймақтар және түрлі бағдарламалар шеңберінде Үкімет тарапынан көрсетілетін қолдаудың басқа да құралдарын ерекше атап өтті. Кәсіпкерлердің айтуынша, Қазақстанның іскерлік ахуалын арттыруда жоғары білікті адами капиталдың болуы үлкен маңызға ие. «Тіл, климат және мәдениеттегі айырмашылықтарға қарамастан, Қазақстанда бизнес үшін тәуекелге қарағанда мүмкіндіктер әлдеқайда көп», – деп қорытындылады форум спикерлері.
Бұл факторлар халықаралық компаниялардың Қазақстанда өңірлік өкілдіктерін ашудағы негізгі факторлардың бірі болды. Жалпы, Қазақстанның Орталық Азия, ТМД, Таяу Шығыс және Еуропа нарықтарына шығу үшін ірі хаб ретіндегі ерекше рөлі атап өтілді.
Қазақстан Елшісі Болат Сүгірбаев қатысушыларға бизнес-форумға деген қызығушылықтары үшін алғыс білдірді. Ол Қазақстан мен Малайзия арасындағы дәстүрлі берік саяси, экономикалық, мәдени және гуманитарлық байланыстарды атап өтті. Дипломат спикерлермен Қазақстан мен Малайзия әлемнің екі қарқынды дамып келе жатқан өңірі – Орталық Азия мен АСЕАН өңіріндегі сауда-экономикалық, инвестициялық және логистикалық орталықтар ретіндегі рөлін өзара нығайтуда тамаша перспективалары бар екенімен толық келісті.
Источник: dknews.kz
