275 Арман
Астанаға әзірбайжандық «Azer Gold» ЖАҚ компаниясының өкілдері Қазақстанда инвестициялық жобаларды жүзеге асыру мүмкіндіктерін зерделеу үшін келді. Сапар барысында компанияның топ-менеджерлері Қазақстан Республикасы Сыртқы істер министрлігі Инвестициялар комитетінің төрағасы Ардақ Зебешевпен және «KAZAKH INVEST» ҰК» АҚ өкілдерімен кездесті, деп хабарлайды DKNews.kz.
«Azer Gold» ЖАҚ аз уақыт ішінде өз елінде ауқымды жобаларды жүзеге асыра алған Әзірбайжан Республикасындағы жетекші тау-кен ұйымы болып табылады. Кәсіпорын металдарды барлау, игеру және өндіру саласында заманауи әдістер мен технологияларды енгізуде пионер болып табылады. Өндірістің өсу тәжірибесі мен динамикасы Қазақстан Республикасындағы тау-кен өнеркәсібінің дамуына үлес қосуға мүмкіндік беретін халықаралық ынтымақтастықты дамыту үшін қолайлы жағдай жасайды.
«Azer Gold» ЖАҚ басқарма төрағасының орынбасары Октай Маммадов түсті және қара металдарды өндіру және өңдеу саласында бірлескен өзара тиімді жобаларды жүзеге асыруға қызығушылық туралы айта отырып, өзара ынтымақтастықты дамытудың жоғары әлеуетін атап өтті. Сонымен қатар, компания геологиялық барлау жұмыстарын жүргізу мүмкіндігін қарастыруда.
Өз кезегінде Қазақстан Республикасы Сыртқы істер министрлігі Инвестициялар комитетінің төрағасы Ардақ Зебешев Қазақстанның тау-кен металлургия өнеркәсібінің инвестициялық әлеуетіне, инвесторларға көрсетілетін мемлекеттік қолдау шараларына тоқталды, сондай-ақ Azer Gold инвестициялық жобаларын жүзеге асыруға қолдау көрсетуге дайындығын білдірді.
«KAZAKH INVEST» ҰК» АҚ қолдауымен ұйымдастырылған сапар аясында делегация үшін ҚР Индустрия және инфрақұрылымдық даму министрлігі, «Тау-Кен Самұрық» ұлттық тау-кен өндіру компаниясы, «Қазгеология» АҚ және «Ұлттық геологиялық қызмет» АҚ өкілдерімен кездесулер ұйымдастырылды.
Источник: dknews.kz
