1419
Арман Қоржымбаев Бас редактор
Шанхайда Қазақстан мен Huawei технологиялық ынтымақтастықты кеңейтуге бағытталған жаңа келісімдерге қол қойды. Ендігі басымдық — заманауи цифрлық инфрақұрылым, жасанды интеллект, экономиканың негізгі салаларын цифрландыру және отандық мамандарды даярлау, деп хабарлайды DKNews.kz.
Қазақстан мен Huawei арасындағы ұзақ жылдық серіктестік жаңа кезеңге қадам басты. Бұл туралы Президент Қасым-Жомарт Тоқаевтың Қытайдың жоғары технологиялық компаниялары басшыларымен өткізген дөңгелек үстелінде айтылды.
Мемлекет басшысы Қытай бизнесінің Қазақстан экономикасын жаңғыртуға қосып отырған үлесін атап өтіп, елімізде табысты жұмыс істеп келе жатқан ірі компаниялардың қатарында Huawei-ді ерекше атады.
Президенттің айтуынша, мұндай бірлескен жобалар жаңа технологияларды енгізуге, жұмыс орындарын ашуға және өнеркәсіптік ынтымақтастықты дамытуға мүмкіндік береді.
Жаңа келісімдер Қазақстанға не береді?
Дөңгелек үстел барысында Huawei қазақстандық серіктестерімен технологиялық ынтымақтастық пен цифрлық трансформацияға арналған бірқатар келісімге қол қойды.
Құжаттардағы күрделі технологиялық атаулардың артында күнделікті өмірге тікелей әсер ететін міндеттер тұр. Бұл — интернет желілерінің тұрақтылығы, деректерді жылдам өңдеу, цифрлық қызметтердің қолжетімділігі және кәсіпорындар жұмысының тиімділігі.
Заманауи желілік және есептеу инфрақұрылымы өнеркәсіп, энергетика, көлік және басқа да маңызды салаларға автоматтандыру мен жасанды интеллект шешімдерін белсенді енгізуге жағдай жасайды. Ал цифрлық технологиялардың өңірлерде де қолжетімді болуы елдің біркелкі дамуы үшін ерекше маңызды.
«Заманауи цифрлық инфрақұрылымды дамыту — экономиканың тұрақты өсімі мен азаматтардың өмір сүру сапасын арттырудың негізгі алғышарттарының бірі. Біздің басым міндеттеріміз — технологияларға тең қолжетімділікті қамтамасыз ету, инфрақұрылымның орнықтылығын күшейту және экономиканың негізгі салаларын цифрлық трансформациялауды жеделдету. Осындай бастамаларды іске асыру Қазақстанның ұзақ мерзімді дамуына берік негіз қалайды», — деді Қазақстан Республикасы Премьер-Министрінің орынбасары — Жасанды интеллект және цифрлық даму министрі Жаслан Мәдиев.
200 мыңнан астам студент білім алды
Huawei Қазақстанның цифрлық инфрақұрылымын дамытуға 30 жылға жуық уақыттан бері қатысып келеді. Алғашқы кезеңде ынтымақтастық негізінен телекоммуникациялық желілермен байланысты болса, бүгінде оның ауқымы әлдеқайда кеңейді.
Енді тараптар есептеу қуаттарын дамытуға, негізгі салаларға цифрлық шешімдер енгізуге, жасанды интеллектіні қолдануға және қазақстандық мамандардың біліктілігін арттыруға басымдық бермек.
«Huawei компаниясы Қазақстанның цифрлық инфрақұрылымын дамытуға 30 жылға жуық уақыт бойы өз үлесін қосып келеді. Ынтымақтастығымыздың келесі кезеңі желілік және есептеу инфрақұрылымын нығайтуға, негізгі салаларға цифрлық шешімдерді енгізуге және жергілікті мамандарды даярлауға бағытталады. AI Sana жобасы аясында бүгінгі таңда 200 мыңнан астам қазақстандық студент білім алды. Біз елдегі цифрлық құзыреттерді дамытуға инвестиция салуды алдағы уақытта да жалғастырамыз», — деді Huawei Technologies компаниясы Бақылау кеңесінің мүшесі, қоғаммен байланыс және корпоративтік коммуникациялар департаментінің президенті Ван Цзяньфэн.
Серіктестіктің келесі кезеңі
Шанхайда қол қойылған келісімдер Қазақстан мен Huawei арасындағы ынтымақтастықтың жекелеген жобалардан ұзақ мерзімді технологиялық серіктестікке ұласып келе жатқанын көрсетеді.
Алдағы кезеңдегі басты міндет — келісімдерді нақты жобаларға айналдыру. Олардың қатарында телекоммуникациялық желілерді жаңғырту, есептеу инфрақұрылымын күшейту, кәсіпорындарға цифрлық шешімдер енгізу және жаңа буын IT-мамандарын даярлау бар.
Бұл Қазақстан үшін тек жаңа технологияларды пайдалану мәселесі емес. Цифрлық инфрақұрылымның сапасы ел экономикасының бәсекеге қабілеттілігіне, бизнестің дамуына және халыққа көрсетілетін қызметтердің қолжетімділігіне тікелей әсер ететін кезең басталды.
Қазақстан мен Huawei Қазақстанның цифрлық инфрақұрылымы Қазақстандағы жасанды интеллект Huawei Қазақстанда технологиялық серіктестік цифрлық трансформация AI Sana жобасы
Источник: dknews.kz
